وقۋ ورنى جانىنان اشىلعان كلۋب مۇشەلەرى, ستۋدەنتتەر, وقىتۋشىلار ادەبيەت, تەاتر, مۋزىكا جانە كينو تاريحىندا ماڭگىلىك ورىن العان, بۇكىل حالىققا ورتاق تانىمال تۇلعالاردى اركەز وسىلاي ەسكە الادى. كەشكە جينالعاندار اقىن, ءارتىس ۆ.ۆىسوتسكي جايلى ايتتى. ونىڭ رەپەرتۋارىندا 600-دەن استام ءان مەن 200-دەن استام ولەڭ بار. ۆلاديمير ۆىسوتسكي اسكەريلەر, شاحتەرلەر, ارحەولوگتار, شاحماتشىلار مەن الپينيستەر ءۇشىن دە ول -ء«وز ادامى» بولىپ قالىپتاسقان. كەڭەس وكىمەتى كەزىندە ءومىر سۇرگەن بۇگىنگى ورتا جاستاعىلار, كەشەگى جاستار ءۆىسوتسيدى ءداۋىر ادامى, ءداۋىر تۇلعاسى دەپ باعالايدى. قوس كلۋبتىڭ توراعاسى اسلان ازەرباەۆتىڭ ايتۋىنشا, ۆلاديمير ۆىسوتسكي – «دامىعان سوتساليزم» كەزەڭىن ايشىقتاپ كورسەتكەن اقىن. ول راديو مەن تەلەۆيدەنيەدە, گازەتتەردە ايتىلماعان جايتتاردى اشىق ايتتى.
- بارد ۆىسوتسكي ءۇشىن «رۇقسات ەتىلمەگەن» تاقىرىپتار بولعان جوق. ول ماحاببات, دوستىق, قىلمىستىق الەم مەن ىشىمدىك تاقىرىپتارىن دا شىعارماشىلىعىنا ارقاۋ ەتتى. ونىڭ پوەزياسى مەن پروزاسى, ارتىستىك جانە رەجيسسەرلىك جۇمىستارى «برەجنەۆ ۋاقىتىن» ناقپا-ناق كورسەتەدى, - دەيدى ا.ازەرباەۆ.
شارا اياسىندا ۆ. ۆىسوتسكيدىڭ ءومىرى مەن شىعارماشىلىعىنا ارنالعان كورمە ءوتتى.
فاريدا بىقاي
«ەگەمەن قازاقستان»
پاۆلودار
سۋرەتتى تۇسىرگەن: رۋفينا تورپيششەۆا
